Saga og Storm blir ikkje kjærastar
I denne romanen følgjer vi bestevennane Saga og Storm. Dei har sin eigen humor og veremåte, og slik trivst dei godt saman. Ein dag kjem det ei ny jente i klassa deira, Boel, og plutseleg står Saga i ein krevjande og omveltande kvardagssituasjon. Boel sin veremåte påverkar dei andre, og Saga kjem i situasjonar ho eigentleg ikkje har lyst til å vere deltakande i.
Erna Osland og Victoria Sandøy: Barnas verdshistorie
I denne boka skildrar Erna Osland barna sin kvardag frå ulike tidsepokar i verdshistoria. Vi får høyre om barn som har vore jegerar, kongar, slavar, soldatar og arbeidd i gruver og fabrikkar.
Brynjulf Jung Tjønn og Skinkeape: Kva tenker du på?
Biletboka Kva tenker du på? handlar om ei jente som prøver å forstå kva som skjer med pappa. Han gjekk frå å tulle og tøyse til å vere stille. Mamma forklarar at pappa har mykje å tenke på. Men stilla varer så lenge at jenta nesten gløymer korleis stemma hans høyrest ut. Regnet kjem, og alt kjennest så tungt.
Marthe Holien Bø: Ni løgner og jakta på eit smil
Ni løgner og jakta på eit smil er ei rørande og hjartevarm forteljing om sorg og glede og å halde på det som var. «Eg ser ned på det mørkeraude blodet som renn frå knea mine. Det er betre å ha vondt i knea enn i hjartet». Vi blir kjende med 9 år og 66 dagar gamle Klara som fortel om ein krevjande livssituasjon.